Endoskopiya

Qastroskopiya və ERCP-dən əvvəl 6-8 saatlıq aclıq tələb olunur — mədənin tamamilə boşalması bu qədər vaxt aparır. Kolonoskopiyadan bir gün öncə isə həkimin təyin etdiyi bağırsaq təmizliyi aparılır: ağızdan xüsusi boşaldıcı dərman içilir, lazım gəldikdə həmin gecə imalə olunur.

Pasiyent endoskopiya otağına alındıqdan sonra prosedur iki formada icra edilə bilər — qırtlaq nahiyəsinin lidokainlə keyləşdirilməsi ilə və ya qoldan, venadaxili verilən sedasiya dərmanları ilə. Diaqnostik endoskopiya adətən üç, bəzən beş dəqiqə çəkir. Kolonoskopiya sedasiya altında 10-15 dəqiqə davam edir və ağrısız aparılır. ERCP stasionar şəraitdə, əməliyyat blokunda, endoskopiya ilə rentgen birlikdə istifadə edilərək, ümumi anesteziya və ya sedasiya ilə icra olunur.

Baxış zamanı orqanın bütün hissələri ardıcıl qiymətləndirilir, xora, polip və ya şübhəli törəmə görüldükdə oradan biopsiya alınır. Prosedur video yazıya alınır və aşkarlanan patologiyanın şəkilli raportu pasiyentə təqdim edilir.

Endoskopiya yalnız şikayət olanda deyil, izləmə məqsədilə də təkrarlanır: polipi çıxarılmış pasiyentlərdə nəzarət üçün, qida borusu, mədə və ya bağırsaqda əməliyyat keçirənlərdə profilaktik olaraq, Kron və ülserativ kolit diaqnozu qoyulanlarda isə müalicədən sonra xoraların sağalıb-sağalmadığını qiymətləndirmək üçün. 45 yaşdan yuxarı, heç bir şikayəti olmayan şəxslərdə də bir dəfə profilaktik baxış təyin oluna bilər.

Səbəbi məlum olmayan qan azlığı, nəcisdə açıq və ya tünd rəngli qan, udma çətinliyi, davamlı qarın ağrısı, uzun sürən ishal və ya qəbizlik, rentgen və tomoqrafiyada şiş şübhəsi — bu hallarda müayinə gecikdirilmir. Sirroz diaqnozu qoyulmuş pasiyentlərdə qida borusu damarları profilaktik olaraq yoxlanılır və qanaxmaya meyilli olduqda öncədən bağlanılır.

Mexaniki sarılıqda ERCP-nin vaxtında aparılması ayrıca əhəmiyyət daşıyır: prosedur gecikdikdə xolangit, ağır pankreatit və sepsisə qədər gedən fəsadların riski artır.